युद्ध कोरोनाविरुद्ध: स्वित्झर्लंडचा आल्प्स पर्वतावर भारतीय तिरंगा झळकवून सलाम

जिनिव्हा: भारतासह जगभरात कोरोना व्हायरसने धुमाकूळ घातला आहे. सर्वच देशांकडून या महामारीला रोखण्यासाठी प्रयत्न केले जात आहेत. या पार्श्वभूमीवर भारतामध्ये सरकारकडून केल्या जाणाऱ्या प्रयत्नांचं कौतुक जगभरात होताना दिसत आहे. त्यातच भारताने कोरोनाच्या संकटाशी लढत असताना जगातील अनेक देशांना मदत देखील केली आहे. याच युद्ध कोरोना विरुद्धच्या लढाईत स्वित्झर्लंडने देखील भारताला अनोखा सलाम केला आहे. प्रसिध्द आल्प्स पर्वतरांगेतील मॅटरहॉर्न पर्वतावर भारतीय तिरंगा झळकवत सलाम केला आहे. भारतीय तिरंगा मॅटरहॉर्न पर्वतावर लाईट्सच्या मदतीने झळकवला आहे. यामधून कोरोनाविरोधातील भारताची लढाई आणि जिंकण्याच्या प्रयत्नांना अनोखा सलाम केला आहे.

सुमारे १२०० किलोमीटर पसरलेल्या आल्प्स पर्वतरांगेला युरोपात अनन्यसाधारण महत्व आहे. युरोपातील अनेक देशांतील नैसर्गिक सौंदर्यातलं एक महत्वाचं नाव म्हणजे ही पर्वतरांग. आपल्याकडे जसं हिमालयाचं महत्व आहे तसंच युरोपात आल्प्सचं महत्व आहे. मॅटरहॉर्न हे १४६९० फूट उंचीचं आल्प्समधील ६ व्या क्रमांकाचं गिरीशिखर आहे. याच मॅटरहॉर्नवर स्वित्झर्लंडमधील लाईट आर्टिस्ट गेरी हॉफस्टेटर यांनी तिरंगा झळकवला आहे.

मिळालेल्या माहितीनुसार, या पर्वतावर मागील २४ मार्चपासून कोरोना महामारीविरोधात जगातील देशांची एकजूट दर्शवण्यासाठी विविध देशांचे झेंडे झळकवण्यात आले आहेत. स्वित्झर्लंडमध्ये कोविड-१९ ने आतापर्यंत १८ हजार लोकांना बाधा झाली आहे. तसेच ४३० लोकांचा मृत्यू झाला आहे. जीवघेण्या कोरोना व्हायरसमुळे आतापर्यंत जगभरात दीड लाखांहुन अधिक लोकांचा मृत्यू झाला आहे. तसेच कोरोना व्हायरसचा संसर्ग झालेल्यांची संख्या २२ लाखांवर पोहोचली आहे.